Александар Цане Скерлевски е роден на денешен ден во 1925 година, во семејство со пет деца во Брусник. Основното образование го завршува во родното село, а гимназија посетува во Битола. Во текот на Втората светска војна, како 16-годишник, се приклучува на антифашистичката борба во 1942 година, станувајќи дел од партизанскиот одред „Пелистер“. По ослободувањето, во 1945 година станува член на КПЈ, а во текот на воената кариера напредува во чинот на капетан. За својата храброст и заслуги добива бројни одликувања, меѓу кои „Медал за храброст“ и „Орден на трудот со златен венец“.
Покрај воената кариера, Скерлевски има значителен придонес во образованието и јавната служба. По завршувањето на Вишата педагошка школа, работи како наставник и директор на ОУ „Стив Наумов“ во Битола, каде во три мандати раководи со училиштето. Во 1963 година, по негова иницијатива, во Брусник е отворено подрачно училиште. Неговото влијание се проширува и на политичко ниво, каде во два мандати, 1967 и 1969 година, е пратеник во Собранието на СР Македонија, а во 1971 година станува член на Комисијата за општествен надзор.
По пензионирањето како директор на Сојузот на возачи на Македонија, Скерлевски продолжува да биде активен во јавниот живот, добивајќи признанија за својата работа во безбедноста на сообраќајот. Во 1992 година организира голема прослава по повод „600 години Брусник“, каде неговиот воведен говор остава силен впечаток. Како член на Организацијата на воените старешини на Македонија, останува активен до крајот на својот живот во 2003 година.
Фотографиите и деталите за животот на партизанот и државник Александар Цане Скерлевски преземени од ФБ објава на неговиот внук која можете да ја најдете овде
