Иранскиот заменик министер за надворешни работи Абас Аракчи се сретна со високи кинески претставници во Пекинг, велејќи дека стратешкото партнерство меѓу Иран и Кина нема да се промени, без оглед на тековните преговори меѓу Техеран и Вашингтон.
На средбата со кинескиот вицепремиер Динг Ксујајанг, одржана во Големата сала на народот, Аракчи истакна дека односите меѓу двете земји остануваат стабилни и отпорни на надворешни влијанија. Динг, член на Постојаниот комитет на Политбирото на Комунистичката партија на Кина, истакна дека Кина и Иран треба да ја зајакнат практичната соработка и заеднички да се спротивстават на притисокот на Западот.
Продолжувајќи ја својата посета, Аракчи разговараше и со министерот за надворешни работи Ванг Ји. По тој повод, Кина изрази поддршка за преговорите на Иран со САД, притоа почитувајќи го правото на Техеран за мирно користење на нуклеарната енергија.
„Иран и Кина се стратешки партнери и ние се консултираме за сите важни прашања. Денеска одржавме два конструктивни состаноци и ги информирав моите кинески колеги за напредокот на индиректните разговори со САД“, изјави Аракчи за Техеран Тајмс.
Третата рунда разговори меѓу Иран и САД, предводена од Аракчи и американскиот претставник Стив Виткоф, е закажана за сабота во Мускат, главниот град на Оман.
Аракчи ја најави и претстојната посета на иранскиот претседател на Кина, како и учеството на претстојниот самит на Шангајската организација за соработка (ШСО), нагласувајќи дека 2025 година ќе биде „златна година“ за односите меѓу двете земји.
Иран и Кина, членки на БРИКС и ШСО, потпишаа 25-годишен договор за соработка, кој вклучува зајакнување на политичките и економските врски, како и заедничко спротивставување на империјалистичките притисоци.
