Борка Талески е роден на 19 јули 1921 година во Прилеп, во фурнаџиско семејство. Основното образование го завршил во родниот град, а средното образование го започнал во Прилеп, но поради затворањето на гимназијата, го продолжил во Битола. Во 1939 година се запишал на Медицинскиот факултет во Белград, каде се приклучил на Комунистичката партија. Активно учествувал во студентските демонстрации против тогашната власт и организирал револуционерни активности во Македонија, особено во Прилеп.
На 2 август 1940 година, Талески бил првиот говорник пред народот во Прилеп за време на Илинденските демонстрации, повикувајќи на борба за независност. Поради овој чин бил уапсен и затворен во Ада Циганлија и логорот Ивањица. По пуштањето, се вратил во Прилеп, но бил под постојан надзор на полицијата. Со бугарската фашистичка окупација во 1941 година, активно се вклучил во организирањето на отпорот, учествувајќи во формирањето на Прилепскиот партизански одред „Гоце Делчев“, кој на 11 октомври 1941 го извршил првиот организиран напад против окупаторот.
Во 1942 година Талески бил испратен на задача во Кавадарци, каде дејствувал со Лазо Филипов – Лавски. На 2 март 1942 година, при движење кон Прилеп, во месноста Чашка, двајцата биле предадени и паднале во заседа на бугарската полиција. Тој ден Борка Талески – Црниот и Лазо Филипов – Лавски ги положиле своите животи за слободата на Македонија.
