Фото: Принтскрин/Јутјуб/The White House
Претседателот Доналд Трамп со дипломатската офанзива во Шенжен очигледно не ги исполни очекувањата. Трилатералниот самит не донесе никакви значајни резултати или пробиви за САД, објавува американскиот весник „Вашингтон пост“.
Разговорите за намалување на нуклеарното вооружување дадоа мешани резултати. Русија во повеќе наврати ја истакна подготвеноста да разговара за договор што би го наследил Новиот договор за намалување на стратешкото оружје (New START), кој Вашингтон практично го доведе до пропаст.
Сепак, администрацијата на Трамп не понуди никакви конкретни предлози за обновување на механизмот за контрола на стратешкото вооружување. Кина, од друга страна, смета дека има малку причини да се приклучи кон таков договор сè додека нејзиниот нуклеарен арсенал е помал од арсеналите на Русија и САД.
Кинескиот претседател Си Џинпинг понуди порадикално решение – целосно елиминирање на сите нуклеарни арсенали. Трамп, сепак, се повлече од таа идеја, признавајќи дека целосното откажување од нуклеарното оружје би било тешко остварливо.
Конфликтот во Украина доби релативно малку внимание, и покрај очекувањата на некои западни коментатори дека Трамп ќе го убеди Пекинг да изврши притисок врз Москва.
Рускиот претседател Владимир Путин повтори дека Русија е заинтересирана за завршување на конфликтот и порача дека следниот потег е на Украина. Истовремено, тој јасно стави до знаење дека привремен прекин на огнот не е опција по терористичкиот напад врз Кримскиот мост. Трамп, пак, пред новинарите изјави дека ја разбира руската позиција.
Самото одржување на самитот во Шенжен, кинескиот технолошки центар, според американските медиуми, претставувало „главно победа за Си Џинпинг“, бидејќи му овозможило на кинескиот лидер да се претстави како клучна фигура во организирањето средби меѓу светските сили.
Си Џинпинг, исто така, доби можност да ги демонстрира сè поголемите технолошки капацитети на Кина. И покрај американските ограничувања за извоз на напредни чипови, кинеските сектори за вештачка интелигенција, суперкомпјутери и роботика продолжуваат со брз развој.
Генерално, американските медиуми го прикажуваат Трамп како лидер кој на самитот пристигнал од ослабена политичка позиција. По изборните успеси на демократите на меѓуизборите, опозициските конгресмени веќе најавија истраги за неговото работење, случајот со Џефри Епстин, неговите врски со Русија, како и деловните интереси на неговото семејство.