Ѓоре Печијарески е истакнат стручњак во областа на земјоделството и тутунопроизводството. Основното и средното образование ги завршил во родниот град, а дипломирал на Земјоделско-шумарскиот факултет во Земун во 1950 година. По дипломирањето, работел во Институтот за тутун – Прилеп, а подоцна бил назначен за директор на Земјоделското стопанство „Орде Чопела“. По неколку години повторно се вратил во Институтот, каде раководел со одделот за технологија, хемија, ферментација и фабрикација на тутунот. Во 1977 година станал директор на Институтот, а во 1978 година докторирал на Земјоделско-шумарскиот факултет во Скопје.
Печијарески активно учествувал во Народноослободителната војна од 1941 година, за што бил одликуван со бројни признанија, меѓу кои Орден заслуга за народ, Орден братство-единство, Орден на трудот со златен венец и Орден на трудот со црвено знаме. Добитник е на Третоноемвриската награда на Собранието на Општина Прилеп, како и златни плакети од „Југотутун“ – Скопје и Тутунскиот комбинат – Прилеп. Покрај овие награди, добил бројни писмени признанија и пофалници за својот придонес во тутунската индустрија и научната работа.
Поради својата општествена активност, Печијарески извршувал бројни политички и раководни функции. Бил пратеник во Соборот на производителите на СРМ, делегат во Сојузниот собор на СФРЈ и член на повеќе комисии. Двапати бил избран за претседател на Општинскиот комитет на СКМ – Прилеп, како и делегат на последните три конгреси на СКМ и СКЈ. Тој е еден од основачите на Друштвото за наука и уметност – Прилеп и негов долгогодишен претседател. Бил претседател и на Централниот работнички совет на „Југотутун“ – Скопје, како и носител на бројни други изборни функции на републичко и општинско ниво.
