Фото: Фејсбук/AKEL International
На 24 мај 2026 година во Кипар се одржаа парламентарни избори за избор на 56 членови на Претставничкиот дом. Прогресивната партија на работниот народ (АКЕЛ) забележа раст на гласовите за 1,4 процентни поени, достигнувајќи 23,9%, со што ги задржа своите 15 пратенички места. Овој резултат ја позиционираше партијата на второто место, зад Демократскиот збор (ДИСИ), и во однос на бројот на пратенички места и според процентот на освоени гласови.
Стефанос Стефану, генерален секретар на АКЕЛ, објави соопштение во кое ги поздрави изборните резултати:
АКЕЛ е тука, силна, во Претставничкиот дом и меѓу народот!
Вечерва се означува почетокот на една нова нагорна линија. Патека која го означува не само враќањето на нашите проценти, туку и глас на доверба што го добивме од општеството.
Оваа изборна кампања ја водевме во тешки услови на дискредитација и изедначување. Наспроти таквиот амбиент, АКЕЛ успеа да го преврти надолниот тренд кој траеше многу години и да сврти нова страница. Одиме напред со одлучност, гледајќи кон иднината!
Ова не се случи случајно. Сè приближивме до општеството преку истакнување на прашањата што влијаат врз секојдневниот живот на граѓаните. Ја нагласивме потребата од поддршка на работниците, средната класа, младите и пензионерите. Со предлог-политики за храбри иницијативи за справување со инфлацијата и трошоците за живот.
Затоа, денес вртиме нова страница, со општеството и со интересите на мнозинството во прв план.
Ново поглавје за нашиот Кипар, за постигнување решение кое ќе ја ослободи и повторно ќе ја обедини нашата земја и нашиот народ.
Ново поглавје за широка прогресивна коалиција против уривањето на работничките права, против екстремната десница и за поддршка на демократијата.
АКЕЛ – Левица – Социјален сојуз е силниот столб на овој прогресивен фронт, кој има за цел да ги промени нештата во нашата земја. Бидејќи нашиот народ заслужува подобро, а тоа е она за што се бориме!
Сакам срдечно да им се заблагодарам на илјадниците граѓани кои ги поддржаа гласачките ливчиња на коалицијата АКЕЛ – Левица – Социјален сојуз.
Сакам да им се заблагодарам на илјадниците волонтери кои напорно работеа во изминатите неколку месеци.
Искрено им благодариме на нашите кандидати кои ја водеа изборната кампања со чесност и достоинство, на кадрите на нашата партија, на народното движење и на пријателите на Социјалниот сојуз.
Ќе продолжиме силно да се бориме во новиот Парламент за доброто на општеството.
Сега и засекогаш, АКЕЛ.
